Шу ўринда нима сабабдан сарлавҳага бундай ибора танлаганимизга изоҳ бериб ўтиш жоиз. Тўғри, биринчи машқ бўйича ҚҚР Нукус шаҳрида туғилиб ўсган Айтмуратов (биринчи мураббийи Анвар Пердибоев) ҳаммасини тўғри бажарди, берилган учта имкониятдан ҳам унумли фойдаланди. Белгиланган оғирликдаги тошларни кўтариб, 100 фоиз натижага эришди. Фақат, бу натижада Ғайратдан кўра, мураббийларимизнинг ҳиссаси кўпроқ, десам, мухлислар ҳайрон бўлишмасин. Ҳа, жуда мураккаб вазиятда Ўзбекистон ёшлар терма жамоаси мураббийлари Жўрабек Зоиров, Маҳмуд Тоғаев, Баҳром Мендибоевлар келишган ҳолда якдил, ягона тўғри қарорни қабул қила олишди. Мутахассисларимиз 2 нафар кучли рақибни бекорга таъқиб қилгандан кўра, ўз имкониятимизни тўлиқ намоён қилиб, бронза медални қўлга киритишни олдиндан режалаштириб олишди. Натижанинг ўсиб боришига эътибор беринг: 137, 142, 146 кг. Бу билан Ғайрат Арманистон терма жамоаси аъзоси Рафик Арутунянни руҳий жиҳатдан издан чиқарди. Рақиб иккинчи уринишда 144 кгни кўтара олмади ва охирги уринишда 145 кгни катта қийинчилик билан забт этди.
